തിരുവനന്തപുരം: സംസ്ഥാനത്ത് അതിശക്തമായ മഴ പെയ്യുന്ന സാഹചര്യത്തില് എട്ട് ജില്ലകളില് വിദ്യാഭ്യാസ സ്ഥാപനങ്ങള്ക്ക് ശനിയാഴ്ച അവധി പ്രഖ്യാപിച്ചു. കോട്ടയം, ഇടുക്കി, പത്തനംതിട്ട, വയനാട്, മലപ്പുറം, ആലപ്പുഴ, പാലക്കാട്, കോഴിക്കോട് ജില്ലകളിലാണ് അവധി.
മലയോര മേഖലയിലുണ്ടായ അതിശക്തമായ മഴയെത്തുടര്ന്ന് ഇടുക്കിയിലും കോട്ടയത്തും പത്തനംതിട്ടയിലും ഉരുല്പൊട്ടല്. തൊടുപുഴയ്ക്ക് സമീപം രണ്ടിടത്ത് ഉരുള്പൊട്ടി. മുട്ടം ചള്ളാവയലിലും അടൂര് മലയിലും ഉരുള്പൊട്ടിയെന്നാണ് പ്രാഥമിക വിവരം. പൂഞ്ഞാര് പയ്യനിത്തോട്ടത്തിലും പത്തനംതിട്ട തൂമ്പാക്കുളത്തും ഉരുള്പൊട്ടലുണ്ടായി. കുടയത്തൂര് അടൂര് മലയിലുണ്ടായ ഉരുള്പൊട്ടലില് കാണാതായ വീട്ടമ്മയ്ക്കായി തിരച്ചില് തുടരുകയാണ്. മഷിക്കല്ലേല് രവി നാരയണന്റെ ഭാര്യ സുമതിയേയാണ് കാണാതായത്. ഇവരുടെ മകന് രതീഷിനെ പരിക്കുകളോടെ നാട്ടുകാര് രക്ഷപ്പെടുത്തി. വെള്ളിയാഴ്ച വൈകീട്ട് മുതല് മലയോര മേഖലകളില് ശക്തമായ മഴയാണ്
കേന്ദ്ര കാലാവസ്ഥ വകുപ്പ് ജില്ലയില് ഓറഞ്ച് അലര്ട്ട് പ്രഖ്യാപിച്ച സാഹചര്യത്തിലാണ് വയനാട് ജില്ലയിലെ അങ്കണവാടികള്, മത പഠന ക്ലാസുകള്, ട്യൂഷന് സെന്ററുകള്, സ്പെഷ്യല് ക്ലാസുകള്, പ്രൊഫഷണല് കോളജുകള് ഉള്പ്പെടെയുള്ള എല്ലാ വിദ്യാഭ്യാസ സ്ഥാപനങ്ങള്ക്കും കലക്ടര് അവധി പ്രഖ്യാപിച്ചത്. റസിഡന്ഷ്യല് സ്കൂളുകള്ക്കും, റസിഡന്ഷ്യല് കോളജുകള്ക്കും അവധി ബാധകമല്ല. ദുരിതാശ്വാസ ക്യാമ്പുകളായി പ്രവര്ത്തിക്കുന്ന സ്കൂളുകള്ക്കും കോളജുകള്ക്കും ശനിയാഴ്ചയ്ക്ക് ശേഷം പുതിയ ഒരു അറിയിപ്പ് ഉണ്ടാകുന്നത് വരെ അവധി തുടരുന്നതാണ്.
ശക്തമായി തുടരുന്ന സാഹചര്യത്തില് കോട്ടയം ജില്ലയിലെ പ്രഫഷണല് കോജുകള് ഉള്പ്പെടെ എല്ലാ വിദ്യാഭ്യാസ സ്ഥാപനങ്ങള്ക്കും ശനിയാഴ്ച ജില്ലാ കലക്ടര് ചേതന് കുമാര് മീണ അവധി പ്രഖ്യാപിച്ചു. അങ്കണവാടികള്, ട്യൂഷന് സെന്ററുകള്, സ്പെഷല് ക്ലാസുകള് എന്നിവയ്ക്കും അവധി ബാധകമാണ്. മുന്കൂട്ടി നിശ്ചയിച്ച പരീക്ഷകള്ക്ക് മാറ്റമുണ്ടാകില്ല. കനത്ത മഴയുടെ പശ്ചാത്തലത്തില് അങ്കന്വാടി മുതല് പ്രൊഫഷണല് കോളജ് വരെയുള്ള പത്തനംതിട്ട ജില്ലയിലെ എല്ലാ വിദ്യാഭ്യാസ സ്ഥാപനങ്ങള്ക്കും ശനിയാഴ്ച കലക്ടര് അവധി പ്രഖ്യാപിച്ചു.
മലപ്പുറം ജില്ലയില് അതിശക്തമായ മഴ പെയ്യുന്ന സാഹചര്യത്തില് പ്രൊഫഷണല് കോളജുകള് ഉള്പ്പെടെയുള്ള വിദ്യാഭ്യാസ സ്ഥാപനങ്ങള്ക്ക് ശനിയാഴ്ച അവധിയായിരിക്കും. മദ്രസകള്, ട്യൂഷന് സെന്ററുകള് എന്നിവയ്ക്കും അവധി ബാധകമാണ്. മുന്കൂട്ടി നിശ്ചയിച്ച യൂണിവേഴ്സിറ്റി, പി.എസ്.എസി. പരീക്ഷകള് എന്നിവയ്ക്ക് മാറ്റമില്ല. അതിശക്തമായ മഴ തുടരുന്ന സാഹചര്യത്തിലും മഴ മുന്നറിയിപ്പുകള് നിലനില്ക്കുന്നതിനാലും ആലപ്പുഴ ജില്ലയില് പ്രൊഫഷണല് കോളജുകള് ഉള്പ്പെടെയുള്ള എല്ലാ വിദ്യാഭ്യാസ സ്ഥാപനങ്ങള്ക്കും ശനിയാഴ്ച അവധി പ്രഖ്യാപിച്ചിട്ടുണ്ട്.
ഓഗസ്റ്റ് 4 വരെയുള്ള ദിവസങ്ങളില് മിതമായതോ നേരിയതോ ആയ മഴ തുടരാനാണു സാധ്യതയെന്ന് കേന്ദ്ര കാലാവസ്ഥ വകുപ്പ് അറിയിച്ചു. തെക്കന് ഗുജറാത്ത് തീരം മുതല് വടക്കന് കേരള തീരം വരെ ന്യൂനമര്ദപാത്തി നിലനില്ക്കുന്നതാണു മഴയ്ക്കു കാരണം. ഇടുക്കി, എറണാകുളം, തൃശൂര്, പാലക്കാട്, മലപ്പുറം, കോഴിക്കോട്, വയനാട്, കണ്ണൂര്, കാസര്കോട് ജില്ലകളില് ഇന്ന് ഓറഞ്ച് അലര്ട്ട് പ്രഖ്യാപിച്ചിട്ടുണ്ട്. 24 മണിക്കൂറിനിടെ 115.6 മില്ലിമീറ്റര് മുതല് 204.4 മില്ലിമീറ്റര് വരെ അതിശക്തമായ മഴ ലഭിക്കാം. തിരുവനന്തപുരം, കൊല്ലം, പത്തനംതിട്ട, ആലപ്പുഴ, കോട്ടയം ജില്ലകളില് യെലോ അലര്ട്ട് ആണ്. 64.5 മില്ലിമീറ്റര് മുതല് 115.5 മില്ലിമീറ്റര് വരെ മഴ ലഭിക്കാനിടയുണ്ട്.
കാലാവസ്ഥാ പ്രവചനങ്ങള് ഇനി കൂടുതല് കൃത്യംവിവിധയിടങ്ങളില് ഇന്നും നാളെയും മണിക്കൂറില് 40-50 കി.മീ വേഗത്തില് ശക്തമായ കാറ്റിനും സാധ്യതയുണ്ട്. കോഴിക്കോട്, കണ്ണൂര്, കാസര്കോട് ജില്ലകളിലെ തീരങ്ങളില് ഉയര്ന്ന തിരമാലകള് കാരണം കടലാക്രമണത്തിനും സാധ്യതയുണ്ട്. തീരദേശവാസികളും മത്സ്യത്തൊഴിലാളികളും ജാഗ്രത പാലിക്കണം. കേരളം, കര്ണാടക, ലക്ഷദ്വീപ് തീരങ്ങളില് ഇന്നു മത്സ്യബന്ധനം പാടില്ല
