തൃശ്ശൂരിലെ സ്വകാര്യ സ്കൂളിൽ ക്ലാസ് മുറിയിലെ മേശവലിപ്പിൽ മൂർഖൻ പാമ്പ്. മേശവലിപ്പ് തുറന്ന കുട്ടികൾ പാമ്പ് കടിയേൽക്കാതിരുന്നത് തലനാരിഴയ്ക്ക്. കുരിയച്ചിറ സെന്റ് പോൾസ് പബ്ലിക് സ്കൂളിലെ ക്ലാസ് മുറിയിലാണ് മൂർഖൻ പാമ്പിനെ കണ്ടെത്തിയത്.ഇന്നലെ വൈകിട്ട് അവസാന പീരിയഡിലാണ് സംഭവം നടന്നത്. പുസ്തകം എടുക്കാൻ വേണ്ടി കുട്ടികൾ മേശവലിപ്പ് തുറന്നപ്പോഴാണ് മൂർഖൻ പാമ്പിനെ കണ്ടത്.തുടർന്ന് കുട്ടികൾ ക്ലാസ് ടീച്ചറെ വിവരമറിയിക്കുകയായിരുന്നു
.
തുടർന്ന് സ്കൂളിലെ അധ്യാപകർ ചേർന്നു ക്ലാസ് മുറിക്കുള്ളിൽ നിന്ന് കുട്ടികളെ സുരക്ഷിതസ്ഥാനത്തേക്ക് മാറ്റി. തുടർന്ന് പാമ്പിനെ അവിടെ നിന്ന് മാറ്റിയതിനുശേഷമാണ് കുട്ടികളെ ക്ലാസ് മുറിക്കുള്ളിലേക്ക് പ്രവേശിപ്പിച്ചത്. ക്ലാസിനുള്ളിലേക്ക് പാമ്പ് എങ്ങനെ എത്തി എന്നതിനെക്കുറിച്ച് വ്യക്തതയില്ല. സ്കൂൾ വിട്ട് കുട്ടികൾ വീട്ടിലെത്തിയതിനു ശേഷം മാതാപിതാക്കളോടാണ് പാമ്പിനെ കണ്ട വിവരം അറിയിച്ചത്. സംഭവം ഒരു കുട്ടിയുടെ രക്ഷിതാവ് അധ്യാപികയോട് ചോദിച്ചപ്പോൾ സ്ഥിരീകരണം ലഭിക്കുകയും ചെയ്തു. കൂടാതെ സംഭവം നേരിട്ട് കണ്ട കുട്ടികളുടെ ശബ്ദ സന്ദേശവും പുറത്തുവന്നിട്ടുണ്ട്.
