ഗ്യാനേഷ് കുമാറിന്‍റെ രാജി ആവശ്യപ്പെട്ടുകൊണ്ടുള്ള പ്രതിഷേധം ശക്തമാക്കി ഇൻഡ്യ സഖ്യം

ന്യൂഡൽഹി: മുഖ്യതെരഞ്ഞെടുപ്പ് കമ്മീഷണർ ഗ്യാനേഷ് കുമാറിന്‍റെ രാജി ആവശ്യപ്പെട്ടുകൊണ്ടുള്ള പ്രതിഷേധം കടുപ്പിക്കാനൊരുങ്ങി ഇൻഡ്യ സഖ്യം. ഇതിന്‍റെ ഭാഗമായി ഇന്ന് രാഷ്ട്രപതി ഭവനിലേക്ക് ഇൻഡ്യ സഖ്യകക്ഷികൾ മാർച്ച് നടത്തിയേക്കും. വൈകിട്ട് മൂന്ന് മണിക്ക് പാർലമെന്‍റ് മന്ദിരത്തിൽ എത്താൻ പ്രതിപക്ഷ എംപിമാർക്ക് മല്ലികാർജുൻ ഖാർഗെ നിർദേശം നൽകി. ഇന്ന് ഉച്ചയ്ക്ക് മൂന്ന് മണിക്ക് സെൻട്രൽ ഹാളിൽ യോഗം ചേർന്ന ശേഷമായിരിക്കും മാർച്ച്. രണ്ടാം തീയതി മുതൽ തുടരുന്ന പ്രക്ഷോഭം കൂടുതൽ തീവ്രമാക്കാൻ എല്ലാ പ്രതിപക്ഷ എംപിമാരോടും തലസ്ഥാനത്ത് തന്നെ തുടരാൻ ആവശ്യപ്പെട്ടിരിക്കുകയാണ്.ഇന്നലത്തെ പ്രതിഷേധത്തിൽ പശ്ചിമ ബംഗാൾ മുൻ മുഖ്യമന്ത്രിയും തൃണമൂൽ കോൺഗ്രസ് നേതാവുമായ മമത ബാനര്‍ജിയും രേവന്ത് റെഡ്ഡിയും സമരമുഖത്തുണ്ടായിരുന്നു. പ്രായവും രാഷ്ട്രീയവും മറന്ന് ഒറ്റക്കെട്ടായാണ് വിദ്യാർഥി സംഘടനകളും രംഗത്തുണ്ട്.കൊണാട്ട്പ്ലേസിൽ ഇൻഡ്യാമുന്നണിയുടെ യോഗം ചേർന്നശേഷം എംപിമാർ മൂന്നുബസുകളിലായി രാജ്ഘട്ടിലേക്ക് തിരിച്ചായിരുന്നു ഇന്നലത്തെ പ്രതിഷേധം. മോദിക്ക് സദ്ബുദ്ധിവരാൻ രാജ്ഘട്ടിൽ പ്രാർഥിക്കുമെന്ന് മല്ലികാർജുൻ ഖാർഗെ വ്യക്തമാക്കിയിരുന്നു. രാജ്യത്തെ ഹൈജാക്ക് ചെയ്യാൻ ആരെയും അനുവദിക്കില്ലെന്നായിരുന്നു രാഹുൽ ഗാന്ധിയുടെ പ്രതികരണം. ബുധനാഴ്ച, കോൺഗ്രസ് അധ്യക്ഷൻ മല്ലികാർജുൻ ഖാർഗെ ഒരുക്കിയ ഉച്ചവിരുന്നിന് ശേഷമാണ് ഒന്നിച്ച് മുന്നോട്ട് പോകാൻ പ്രതിപക്ഷ പാര്‍ട്ടികൾ തീരുമാനിച്ചത്.സമരം രാജ്യത്തിന്റെ മറ്റുനഗരങ്ങളിലേക്കും വ്യാപിക്കുകയാണ്. എസ്ഐആറിലൂടെ വോട്ട് നഷ്ടപ്പെട്ടവരെ പങ്കെടുപ്പിച്ച് കർണാടകയില്‍ നടത്തിയ പ്രതിഷേധത്തില്‍ ‍പ്രകാശ് രാജും ആക്ടിവിസ്റ്റും യുട്യൂബറുമായ ധ്രുവ് റാഠിയും രൂക്ഷ വിമർശം ഉന്നയിച്ചു. ഗ്യാനേഷിന്റെ ഉപകരണമാക്കുന്ന നരേന്ദ്രമോദിയും രാജിവെക്കണമെന്ന ആവശ്യവും ഉയർന്നു. എസ്ഐആർ വഴി വോട്ട് നഷ്ടപ്പെട്ടവരുടെ അനുഭവങ്ങള്‍ കേട്ട ശേഷമായിരുന്ന ബംഗളൂരുവിലെ ഫ്രീഡം പാർക്കില്‍ ഇരുവരുടേയും പ്രസംഗം. ഗ്യാനേഷ് കുമാർ രാജിവെക്കുന്നത് വരെ പ്രതിഷേധം തുടരുമെന്ന് മുതിർന്ന കോൺഗ്രസ് നേതാവ് പവൻ ഖേഡ പ്രതികരിച്ചു.