വാഷിങ്ടൺ: കിഴക്കൻ പസഫിക് സമുദ്രത്തിൽ ലഹരിമരുന്ന് കടത്തുകയായിരുന്നെന്ന് സംശയിക്കുന്ന ഒരു ബോട്ടിന് നേരെ യുഎസ് സൈന്യം നടത്തിയ ആക്രമണത്തിൽ രണ്ട് പേർ കൊല്ലപ്പെട്ടു. യുഎസ് സതേൺ കമാൻഡ് (SOUTHCOM) ആണ് ഇക്കാര്യം വ്യക്തമാക്കിയത്. കൊല്ലപ്പെട്ടവരെ “നാർക്കോ-ഭീകരർ” (Narco-terrorists) എന്നാണ് യുഎസ് സൈന്യം വിശേഷിപ്പിച്ചത്. ഇവരെക്കുറിച്ചുള്ള കൂടുതൽ വിവരങ്ങൾ പുറത്തുവിട്ടിട്ടില്ല. ആക്രമണത്തിൽ യുഎസ് സൈനികർക്ക് പരിക്കേറ്റിട്ടില്ല.
ട്രംപ് അധികാരത്തിലെത്തിയ ശേഷം ലഹരിമരുന്ന് മാഫിയകൾക്കെതിരെ ശക്തമായ നടപടികളാണ് യുഎസ് സ്വീകരിക്കുന്നത്. ഇതിന്റെ ഭാഗമായി ‘ഓപ്പറേഷൻ സതേൺ സ്പിയർ’ എന്ന പേരിൽ ആരംഭിച്ച സൈനിക നീക്കങ്ങൾ കരീബിയൻ കടലിലും പസഫിക് സമുദ്രത്തിലും തുടരുന്നുണ്ട്. കഴിഞ്ഞ സെപ്റ്റംബർ മുതൽ ലഹരിമരുന്ന് കടത്ത് തടയാൻ നടത്തിയ ഇത്തരം സൈനിക നീക്കങ്ങളിൽ ഇതുവരെ 170-ലധികം ആളുകൾ കൊല്ലപ്പെട്ടിട്ടുണ്ടെന്നാണ് റിപ്പോർട്ട്. വിചാരണ കൂടാതെ ഇത്തരം വധശിക്ഷകൾ നടപ്പിലാക്കുന്നത് അന്താരാഷ്ട്ര നിയമങ്ങളുടെ ലംഘനമാണെന്ന് ആംനസ്റ്റി ഇന്റർനാഷണൽ ഉൾപ്പെടെയുള്ള മനുഷ്യാവകാശ സംഘടനകൾ വിമർശിച്ചിട്ടുണ്ട്. എന്നാൽ ലഹരിമരുന്ന് കടത്ത് തടയാൻ ഇത്തരം കടുത്ത നടപടികൾ അനിവാര്യമാണെന്നാണ് യുഎസ് പ്രതിരോധ വകുപ്പിന്റെ നിലപാട്. ലഹരി മാഫിയകൾക്കെതിരായ നീക്കങ്ങൾ വരും ദിവസങ്ങളിലും തുടരുമെന്നാണ് സൂചന
