കോർപ്പറേറ്റ് കാര്യ മന്ത്രാലയം (എംസിഎ) പിഎം ഇന്റേൺഷിപ്പ് സ്കീം 2025-ന്റെ രജിസ്ട്രേഷൻ സമയപരിധി നീട്ടി. താൽപ്പര്യമുള്ളവരും യോഗ്യരുമായ ഉദ്യോഗാർത്ഥികൾക്ക് ഔദ്യോഗിക വെബ്സൈറ്റായ pminternship.mca.gov.in സന്ദർശിച്ച് ഏപ്രിൽ 15 വരെ ഓൺലൈൻ അപേക്ഷ സമർപ്പിക്കാം. ഔദ്യോഗിക വെബ്‌സൈറ്റിൽ ഇങ്ങനെ പറയുന്നു “രാജ്യത്തിന്റെ പുരോഗതിക്ക് അർത്ഥവത്തായ സംഭാവന നൽകാൻ കഴിയുന്ന വൈദഗ്ധ്യവും അറിവുമുള്ള ഒരു തൊഴിൽ ശക്തിയെ സൃഷ്ടിക്കുന്നതിനുള്ള ഒരു സുപ്രധാന ചുവടുവെയ്പ്പാണ് പിഎം ഇന്റേൺഷിപ്പ് പദ്ധതി. സൈദ്ധാന്തിക അറിവും പ്രായോഗിക അനുഭവവും തമ്മിലുള്ള വിടവ് നികത്തുന്നതിലൂടെ, നാളത്തെ വെല്ലുവിളികൾ ഏറ്റെടുക്കാൻ തയ്യാറായ വൈദഗ്ധ്യമുള്ള യുവാക്കളുടെ അടിത്തറ കെട്ടിപ്പടുക്കുകയാണ് ഈ പദ്ധതി.”
യുവാക്കൾക്ക് ഇന്റേൺഷിപ്പ് അവസരങ്ങൾ നൽകുന്നതിനും അക്കാദമിക് പഠനത്തിനും രൂപകൽപ്പന ചെയ്ത ഒരു സർക്കാർ സംരംഭമാണ് പിഎം ഇന്റേൺഷിപ്പ് പദ്ധതി. താഴ്ന്ന വരുമാനമുള്ള കുടുംബങ്ങളിലെ 21-24 വയസ്സ് പ്രായമുള്ള യുവാക്കളെ ലക്ഷ്യമിട്ട് മികച്ച 500 കമ്പനികളിൽ 12 മാസത്തെ ഇന്റേൺഷിപ്പ് ഈ പ്രോഗ്രാം വാഗ്ദാനം ചെയ്യുന്നു. ഒരു കോടി യുവാക്കൾക്ക് ഇന്റേൺഷിപ്പ് സുഗമമാക്കുക എന്ന ലക്ഷ്യത്തോടെയാണ് ഈ ഇന്റേൺഷിപ്പ് നടത്തുന്നത്.
