പാലക്കാട്: നിപാ വൈറസ് പ്രതിരോധത്തിനായി ആൻ്റിവൈറൽ കണ്ടെത്തി ഐ ഐ ടിയിലെ ഗവേഷകർ. മനുഷ്യശരീരത്തിനുള്ളിൽ വൈറസിന്റെ വർധനവ് തടയുന്നതിനുള്ള പുതിയ നാനോമെഡിസിൻ വികസിപ്പിക്കാനായെന്ന് പാലക്കാട് ഐഐടി ഗവേഷകർ പറയുന്നു. ഐഐടി ബയോളജിക്കൽ സയൻസസ് ആൻഡ് എഞ്ചിനീയറിംഗ് വിഭാഗത്തിലെ ഡോ. ഗിരിധരൻ ലോകനാഥൻ മലർവിഴി, പ്രൊഫ. ജഗദീഷ് ബായ്രി എന്നിവരാണ് പുതിയ കണ്ടുപിടിത്തത്തിന് പിന്നിൽ.
സസ്യ തന്മാത്രകളെ അടിസ്ഥാനമാക്കിയുള്ള ആൻഡ്രോഗ്രാഫോളൈഡ്, സ്റ്റിഗ്മാസ്റ്ററോൾ എന്നീ രണ്ട് തന്മാത്രകളെയാണ് ഇരുവരും ഗവേഷണത്തിലൂടെ തിരിച്ചറിഞ്ഞത്. നിപ വൈറസിന് ആവശ്യമായ പ്രധാന വൈറൽ പ്രോട്ടീനുകൾക്കെതിരെ ശക്തമായ ആന്റി നിപ വൈറസ് ശേഷിയുള്ളവയാണ് ഇവ. ഈ തന്മാത്രകൾ നാനോകോൺജുഗേറ്റുകളായി രൂപകൽപന ചെയ്തപ്പോൾ അവയുടെ നിപ വിരുദ്ധ ഫലപ്രാപ്തി വർധിച്ചതായി കണ്ടെത്തി. നിപാ അണുബാധയുടെ നിയന്ത്രണത്തിനായി നിലവിൽ ഉപയോഗിക്കുന്ന റെംഡെസിവിർ, റിബാവിറിൻ, ഫാവിപിരാവിർ തുടങ്ങിയ ആൻ്റി വൈറൽ മരുന്നുകളെ മറികടക്കാൻ ഈ സംയുക്തങ്ങൾക്ക് കഴിയുമെന്നും ഗവേഷകർ കണ്ടെത്തി.
നിപ വൈറസ് ജനിതക വസ്തുക്കളുടെ സംരക്ഷണം, അതിജീവനം, പെരുകൽ പ്രകിയകൾ ന്യൂക്ലിയോപ്രോട്ടീൻ പോലുള്ള പ്രധാന പ്രോട്ടീനുകളെ ആശ്രയിച്ചാണ് നടക്കുന്നത്. സ്ഥിരതയും പ്രവർത്തനക്ഷമതയും നിലനിർത്താൻ ഫോസ്ഫോപ്രോട്ടീൻ എന്ന മറ്റൊരു പ്രോട്ടീനിൽ നിന്നുള്ള പിന്തുണയും ഇതിന് ആവശ്യമാണ്. വൈറസിന് അതിന്റെ ആർഎൻഎ പുനർനിർമാണത്തിന് ആർഎൻഎ-ഡിപെൻഡന്റ് ആർഎൻഎ പോളിമറേസ് എന്ന എൻസൈമും നിർണായകമാണ്. ഈ വൈറൽ പ്രോട്ടീനുകളെ ലക്ഷ്യമിട്ടാണ് പുതിയ കണ്ടെത്തൽ
ആൻഡ്രോഗ്രാഫോളൈഡും സ്റ്റിഗ്മാസ്റ്ററോളും സ്വാഭാവികമായി ഉണ്ടാകുന്നതും നിശ്ചിത അളവിലുള്ള ഉപയോഗത്തിന് സുരക്ഷിതമായി കണക്കാക്കപ്പെടുന്നതായും ഗവേഷകർ പറയുന്നു. സിദ്ധ, ആയുർവേദം എന്നിവയിൽ വിവിധ ചികിത്സകൾക്കായി ഉപയോഗിക്കുന്നതായും പറയപ്പെടുന്നു. പ്രാഥമികമായി രോഗപ്രതിരോധശേഷി വർധിപ്പിക്കുന്നതിനും കൊളസ്ട്രോൾ കുറയ്ക്കുന്ന ഏജന്റുകളായും ആൻ്റി-ഇൻഫ്ലമേറ്ററി സംയുക്തങ്ങളായും പനിയ്ക്കും സാധാരണ അണുബാധകൾക്കുമുള്ള ചികിത്സകൾക്കുമാണ് ഈ തന്മാത്രകൾ ഉപയോഗിച്ച് വരുന്നത്. നിപ നിയന്ത്രണത്തിന് സുരക്ഷിതവും ഫലപ്രദവുമായ രീതിയിൽ ചെലവുകുറഞ്ഞ ചികിത്സയ്ക്ക് ഉപയോഗിക്കാനാകുമെന്ന പ്രതീക്ഷ നൽകുന്നതാണ് കണ്ടുപിടുത്തം.
നിപ പോലുള്ള അപകടസാധ്യതയുള്ള രോഗകാരികളെ പഠനവിധേയമാക്കുന്നതിനുള്ള ഉയർന്ന സുരക്ഷാ ബയോ സേഫ്റ്റി ലെവൽ-4 സൗകര്യങ്ങൾ ആവശ്യമില്ലാത്ത, നൂതന ലബോറട്ടറി പരിശോധനകൾക്കുള്ള റാപിഡ് ടെസ്റ്റിങ് ഇന്നൊവേറ്റിവ് ലാബ് ഐഐടി ഗവേഷക സംഘം വികസിപ്പിച്ചു കൊണ്ടിരിക്കുകയാണ്. തിരിച്ചറിഞ്ഞ മരുന്നുകളുടെ ആൻ്റി വൈറൽ സാധ്യതകളുടെ മൂല്യനിർണയം ഇതിലൂടെ വേഗത്തിലാക്കുമെന്ന പ്രതീക്ഷയിലാണ് ഗവേഷകർ
