തിരുവില്വാമല: കേരളത്തിലെ പത്ത് മഹാക്ഷേത്രങ്ങളിലൊന്നായ തിരുവില്വാമല വില്വാദ്രിനാഥ ക്ഷേത്രത്തിൽ മോഷണം. ബുധനാഴ്ച പുലർച്ചെയോടെയാണ് സംഭവം. നാലമ്പലത്തിനകത്ത് ഓടു പൊളിച്ച് കടന്ന മോഷ്ടാവ് കൗണ്ടർ പൊളിച്ചാണ് മോഷണം നടത്തിയിരിക്കുന്നത്.
രാവിലെ അഞ്ചിന് കൗണ്ടർ തുറക്കാനെത്തിയ ജീവനക്കാരാണ് വിവരം അറിഞ്ഞത്. ഒരു ലക്ഷത്തിലധികം രൂപ നഷ്ടപ്പെട്ടതായാണ് പ്രാഥമിക വിവരം. ഉടൻ പഴയന്നൂർ പോലീസിൽ വിവരം അറിയിച്ചു. പതിവ് ചടങ്ങുകൾക്കും ദർശനത്തിനും മുടക്കം വരുത്തിയിട്ടില്ല. പോലീസ് എത്തി പരിശോധനകൾ പൂർത്തിയാക്കിയാൽ മാത്രമെ വിശദവിവരങ്ങൾ ലഭിക്കുകയുള്ളു.
