തിരുവനന്തപുരം: അത്യാധുനിക സൗകര്യങ്ങളുമായി കെഎസ്‌ആർടിസിയുടെ എസി സൂപ്പർഫാസ്‌റ്റ്‌ പ്രീമിയം സർവീസ്‌ യാത്രയ്ക്ക് തയ്യാറായി. 10 ബസുകളാണ്‌ ആദ്യഘട്ടത്തിൽ സർവീസ്‌ നടത്തുക. സൂപ്പർഫാസ്‌റ്റിനും എക്‌സ്‌പ്രസിനും ഇടയിലായിരിക്കും ടിക്കറ്റ് നിരക്ക്‌. മ്യൂസിക്‌ സിസ്‌റ്റം, വൈഫൈ കണക്‌ഷൻ, പുഷ്‌ ബാക്ക്‌ സീറ്റ്‌ എന്നീ സൗകര്യങ്ങൾ ഉണ്ടാകും. ബസിൽ 40 സീറ്റുകളാണ്‌ ഉണ്ടാവുക.
മുൻകൂട്ടി യാത്രക്കാർക്ക് ടിക്കറ്റ് ബുക്ക്‌ ചെയ്യാം. ഇടയ്‌ക്ക്‌ യാത്രക്കാർക്ക് ഭക്ഷണം കഴിക്കാൻ ഗുണനിലവാരമുള്ള ഹോട്ടലുകളിൽ സൗകര്യം ഒരുക്കും. തിരുവനന്തപുരം – കോഴിക്കോട്‌, കോഴിക്കോട്‌ – തിരുവനന്തപുരം, തിരുവനന്തപുരം – പാലക്കാട്‌, പാലക്കാട്‌ – തൃശൂർ റൂട്ടുകളിലാണ്‌ എസി സൂപ്പർഫാസ്‌റ്റ്‌ പ്രീമിയം സർവീസ്‌ പരിഗണിക്കുന്നത്‌. തുടക്കത്തിൽ ദേശീയപാതയുടെ നിർമാണം നടക്കുന്നതിനാൽ എംസി റോഡിനാണ്‌ മുൻഗണന നൽകുന്നത്. കുറഞ്ഞ ചെലവിൽ സൗകര്യപ്രദമായ യാത്രയാണ്‌ അത്യാധുനിക സൗകര്യങ്ങളുമായി എത്തുന്ന എസി സൂപ്പർഫാസ്‌റ്റ്‌ പ്രീമിയം സർവീസിലൂടെ കെഎസ്‌ആർടിസിയുടെ ലക്ഷ്യം.
