തിരുവനന്തപുരം: ആധാർ സേവനങ്ങളെക്കുറിച്ച് പൊതുജനങ്ങൾക്ക് ലളിതമായ രീതിയിൽ അറിവ് നൽകുന്നതിനായി യുണീക് ഐഡന്റിഫിക്കേഷൻ അതോറിറ്റി ഓഫ് ഇന്ത്യ (UIDAI) തങ്ങളുടെ ഔദ്യോഗിക മാസ്കോട്ട് ‘ഉദയ്’ (UDAI) പുറത്തിറക്കി.
തിരുവനന്തപുരത്ത് നടന്ന ചടങ്ങിൽ വെച്ചാണ് മാസ്കോട്ടിനെ അനാവരണം ചെയ്തത്. ഈ നേട്ടത്തിന് പിന്നിൽ ഒരു മലയാളി തിളക്കവുമുണ്ട്. രാജ്യമെമ്പാടും നടന്ന മത്സരത്തിൽ നിന്ന് തിരഞ്ഞെടുക്കപ്പെട്ട ഉദയിൻ്റെ രൂപകല്പന നിർവ്വഹിച്ചത് തൃശൂർ സ്വദേശിയായ അരുൺ ഗോകുലാണ്.
മൈഗവ് (MyGov) പ്ലാറ്റ്ഫോം വഴി ദേശീയ തലത്തിൽ സംഘടിപ്പിച്ച ഡിസൈൻ മത്സരത്തിൽ 875 എൻട്രികളിൽ നിന്നാണ് അരുൺ ഗോകുലിന്റെ ഡിസൈൻ ഒന്നാം സ്ഥാനം നേടിയത്. ആധാർ എൻറോൾമെൻ്റ്, അപ്ഡേഷൻ, സുരക്ഷിതമായ ഉപയോഗം തുടങ്ങിയ കാര്യങ്ങളിൽ ജനങ്ങൾക്ക് ഒരു സഹായിയായി ‘ഉദയ്’ പ്രവർത്തിക്കും. രൂപകല്പനയിൽ അരുൺ ഗോകുൽ ഒന്നാം സ്ഥാനം നേടിയപ്പോൾ, പൂനെ സ്വദേശി ഇദ്രീസ് ദവായ്വാല, ഉത്തർപ്രദേശിലെ കൃഷ്ണ ശർമ്മ എന്നിവർ യഥാക്രമം രണ്ടും മൂന്നും സ്ഥാനങ്ങൾ കരസ്ഥമാക്കി. ഭോപ്പാൽ സ്വദേശിനി റിയ ജെയിൻ നിർദ്ദേശിച്ച ‘ഉദയ്’ എന്ന പേരാണ് മാസ്കോട്ടിനായി തിരഞ്ഞെടുത്തത്.
എന്താണ് ‘ഉദയ്’ കൊണ്ട് ലക്ഷ്യമിടുന്നത്?
കോടിക്കണക്കിന് വരുന്ന ആധാർ ഉപഭോക്താക്കൾക്കും സാധാരണക്കാർക്കും ആധാർ സംബന്ധമായ സാങ്കേതിക വിവരങ്ങൾ എളുപ്പത്തിൽ മനസ്സിലാക്കി കൊടുക്കുക എന്നതാണ് ഈ മാസ്കോട്ടിന്റെ ലക്ഷ്യം. ആധാർ ഒതന്റിക്കേഷൻ, ഓഫ്ലൈൻ വെരിഫിക്കേഷൻ, വിവരങ്ങൾ സുരക്ഷിതമായി പങ്കുവെക്കൽ തുടങ്ങിയ കാര്യങ്ങളിൽ ഉദയ് ഒരു വഴികാട്ടിയായി മാറും. എല്ലാ പ്രായക്കാർക്കും ഒരുപോലെ ഇഷ്ടപ്പെടുന്ന രീതിയിലാണ് ഇതിന്റെ രൂപകല്പന.
നേതൃത്വത്തിൻ്റെ വാക്കുകൾ
യുഐഡിഎഐ ചെയർമാൻ നീലകണ്ഠ മിശ്ര വിജയികളെ ആദരിക്കുകയും മാസ്കോട്ട് പുറത്തിറക്കുകയും ചെയ്തു. ആധാർ ആശയവിനിമയം കൂടുതൽ ലളിതമാക്കാനുള്ള യുഐഡിഎഐയുടെ ശ്രമങ്ങളുടെ ഭാഗമാണിതെന്ന് അദ്ദേഹം പറഞ്ഞു. പൊതുജന പങ്കാളിത്തത്തിലൂടെ ഒരു മാസ്കോട്ടിനെ കണ്ടെത്തിയത് ആധാറിലുള്ള ജനങ്ങളുടെ വിശ്വാസമാണ് കാണിക്കുന്നതെന്ന് സിഇഒ ഭുവനേഷ് കുമാർ അഭിപ്രായപ്പെട്ടു.യുഐഡിഎഐ ഡെപ്യൂട്ടി വിവേക് സി. വർമ്മയും ചടങ്ങിൽ പങ്കെടുത്തു.
ഡിജിറ്റൽ തിരിച്ചറിയൽ രേഖ എന്നതിലുപരി ജനങ്ങളുമായി നേരിട്ട് സംവദിക്കുന്ന ഒരു സുഹൃത്തായി ആധാറിനെ മാറ്റാനാണ് ഈ പുതിയ നീക്കത്തിലൂടെ അധികൃതർ ലക്ഷ്യമിടുന്നത്.
