ത്രിദിന സന്ദര്‍ശനത്തിനായി ശ്രീലങ്കൻ പ്രധാനമന്ത്രി ഹരിണി അമരസൂര്യ ഇന്ന് ഇന്ത്യയിലെത്തും

ഡൽഹി: ശ്രീലങ്കൻ പ്രധാനമന്ത്രി ഡോ. ഹരിണി അമരസൂര്യ മൂന്നു ദിവസത്തെ ഔദ്യോഗിക സന്ദർശനത്തിനായി ഇന്ന് (ഒക്ടോബർ 16) ഇന്ത്യയിലെത്തും. പ്രധാനമന്ത്രിയായി ചുമതലയേറ്റ ശേഷം ഹരിണി അമരസൂര്യ നടത്തുന്ന ആദ്യ ഇന്ത്യൻ സന്ദർശനമാണിത്. ഉഭയകക്ഷി ബന്ധം കൂടുതൽ ദൃഢമാക്കുക എന്ന ലക്ഷ്യത്തോടെയാണ് സന്ദർശനം.പ്രധാനമന്ത്രി നരേന്ദ്ര മോദി, വിദേശകാര്യ മന്ത്രി എസ്. ജയശങ്കർ തുടങ്ങിയവരുമായി ശ്രീലങ്കൻ പ്രധാനമന്ത്രി കൂടിക്കാഴ്ച നടത്തും. ഇരുരാജ്യങ്ങളും തമ്മിലുള്ള ബന്ധം കൂടുതൽ ഊർജ്ജിതമാക്കുന്നതിനായി വ്യാപാരം, നിക്ഷേപം, വിദ്യാഭ്യാസം, സാങ്കേതികവിദ്യ, വികസന സഹകരണം എന്നീ സുപ്രധാന മേഖലകളിൽ ചർച്ചകൾ നടക്കും. ഇന്ത്യയുടെ ‘സമുദ്രസാഗർ വിഷൻ’, ‘ അയൽപക്കത്തിന് പ്രഥമ പരിഗണന’ എന്നീ നയങ്ങൾ ശക്തിപ്പെടുത്തുന്നതിന് ഈ സന്ദർശനം കൂടുതൽ സഹായിക്കും.