ബാതുമി : ജോര്ജിയയില് നടക്കുന്ന ഫിഡെ വനിത ചെസ് ലോകകപ്പില് ഫൈനലില് കടന്ന് ചരിത്രമെഴുതി ഇന്ത്യന് കൗമാരതാരം ദിവ്യ ദേശ്മുഖ്. ചെസ് ലോകകപ്പ് ഫൈനലിലെത്തുന്ന ആദ്യ ഇന്ത്യന് വനിതയാണ് 19കാരിയായ ദിവ്യ.
ചൈനയുടെ മുന് ലോകചാമ്പ്യന് ടാന് സോംങ്കിയെ സെമിയിലെ രണ്ടാം ഗെയിമില് കീഴടക്കിയാണ് ദിവ്യ ഫൈനലില് കടന്നത്. ഇരുവരും തമ്മിലുള്ള ആദ്യ ഗെയിം സമനിലയിലായിരുന്നു. ആദ്യമായാണ് ഇന്ത്യന്താരം ചാംപ്യന്ഷിപ്പിന്റെ ഫൈനലിലെത്തുന്നത്.
ഇന്ത്യയുടെ കൊനേരു ഹംപിയും ചൈനയുടെ ഗ്രാന്റ്മാസ്റ്റര് ലെയ് ടിന്ജിയും തമ്മിലുള്ള സെമിയിലെ വിജയിയെയാണ് ദിവ്യ ഫൈനലില് നേരിടുക. ഹംപിയും ടിന്ജിയും തമ്മിലുള്ള സെമിയിലെ രണ്ടു ഗെയിമുകളും സമനിലയിലായി. ഇന്നലെ 75 നീക്കങ്ങളിലാണ് ഇവര് സമനില സമ്മതിച്ചത്. ഇതോടെ, ഇന്ന് നടക്കുന്ന ടൈ ബ്രേക്കറിലൂടെ വിജയിയെ തീരുമാനിക്കും.
