രാമേശ്വരത്തെ പുതിയ പാമ്ബൻ കടല്‍പ്പാലത്തിലൂടെയുള്ള ട്രെയിനിന്‍റെ പരീക്ഷണ ഓട്ടം വിജയകരം. ദക്ഷിണ മേഖലാ റെയില്‍വേ സുരക്ഷാ കമ്മീഷണർ എ.എം.ചൌധരിയുടെ മേല്‍നോട്ടത്തിലാണ് പരിശോധന നടന്നത്. ട്രെയിൻ മണ്ഡപം- പാമ്ബൻ റെയില്‍വെ സ്റ്റേഷനുകള്‍ക്കിടയിലാണ് ഓടിച്ചത്. പഴയ പാമ്ബൻ പാലത്തിന് സമാന്തരമായാണ് പുതിയ പാലം നിര്‍മിച്ചിരിക്കുന്നത്.
പുതിയ പാലം ഗതാഗതത്തിന് തുറന്നുകൊടുക്കുന്നതിന് മുൻപുളള അവസാന നടപടിക്രമമാണ് വിജയകരമായി പൂർത്തിയായത്. പാലത്തിന്‍റെ ഉദ്ഘാടന തീയതി സുരക്ഷാ കമ്മീഷണർ റിപ്പോർട്ട് സമർപ്പിച്ചതിന് ശേഷം തീരുമാനിക്കും. രാജ്യത്തെ കപ്പലുകള്‍ക്ക് കടന്നുപോകാൻ ഒരുഭാഗം ലംബമായി ഉയരുന്ന ആദ്യ വെർട്ടിക്കല്‍ ലിഫ്ടിംഗ് കടല്‍പ്പാലമാണ് പാമ്ബനിലേത്. 535 കോടി രൂപ ചെലവിലാണ് റെയില്‍വേ എഞ്ചിനീയറിങ് വിഭാഗം പാലം നിർമ്മിച്ചത്. പ്രധാനമന്ത്രി ഈ മാസം അവസാനമോ അടുത്ത മാസം ആദ്യമോ പാലം ഉദ്ഘാടനം ചെയ്യുമെന്നാണ് ലഭിക്കുന്ന വിവരം.
