കല്‍പ്പറ്റ: സൂചിപ്പാറയില്‍ കുടുങ്ങിയ മൂന്ന് പേരെ രക്ഷിച്ചു. മലപ്പുറം സ്വദേശികളായ സാലി, റിയാസ്, മുഹ്സിൻ എന്നിവരാണ് സൂചിപ്പാറയ്ക്ക് സമീപമുള്ള പാറയില്‍ കുടുങ്ങിയത്. ഇന്നലെ വൈകിട്ടാണ് ഇവർ ചാലിയാർ പുഴ കടന്ന് വനത്തിലൂടെ സൂചിപ്പാറയിലേക്ക് പോയത്. പിന്നെ മുന്നോട്ടുപോകാനും സാധിച്ചില്ല. രാത്രി മുഴുവൻ പാറക്കെട്ടില്‍ കുടുങ്ങി.
ഇവരില്‍ രണ്ട് പേർക്ക് കാലിന് പരിക്കേറ്റിട്ടുണ്ടെന്നാണ് വിവരം. ഒരാള്‍ നീന്തി മറുകരയിലേക്ക് വന്നിരുന്നു. പരിക്കേറ്റ രണ്ട് പേരെയും എയർ ലിഫ്‌റ്റ് ചെയ്‌തു. വൈദ്യസഹായം നല്‍കിയ ശേഷം മൂന്ന് പേരെയും മേപ്പാടി പൊലീസ് സ്റ്റേഷനിലേക്ക് കൊണ്ടുപോകും. വളരെ സാഹസികമായിട്ടാണ് ഇവരെ രക്ഷപ്പെടുത്തിയത്. പൊലീസും വനംവകുപ്പ് ഉദ്യോഗസ്ഥരുമൊക്കെ എത്തിയാണ് മൂവർ സംഘത്തെ രക്ഷിച്ചതെന്നാണ് വിവരം.
