സിറിയയിലേക്ക് വീണ്ടും സഹായമെത്തിച്ച് ഖത്തര്‍

ദോഹ: സിറിയയിലേക്ക് വീണ്ടും സഹായമെത്തിച്ച് ഖത്തര്‍. ബശ്ശാറുല്‍ അസദ് സ്ഥാന ഭ്രഷ്ഠനാക്കപ്പെട്ടതിന് പിന്നാലെ ഖത്തര്‍ പ്രഖ്യാപിച്ച എയര്‍ ബ്രിഡ്ജിന്റെ ഭാഗമായാണ് സിറിയയിലേക്ക് സഹായമെത്തിക്കുന്നത്. ഖത്തര്‍ ഫണ്ട് ഫോര്‍ ഡെവലപ്മെന്റിന്റെ 37 ടണ്‍ ഭക്ഷ്യവസ്തുക്കളാണ് ഇത്തവണ തലസ്ഥാന നഗരമായ ഡമസ്‌കസിലെത്തിച്ചത്. ഭരണ മാറ്റത്തിന് പിന്നാലെ ദുരിതത്തിലായ സിറിയന്‍ ജനതയ്ക്ക് തുടക്കം മുതല്‍ തന്നെ ഖത്തര്‍ സഹായം വാഗ്ദാനം ചെയ്തിരുന്നു. ആദ്യ ഘട്ടത്തില്‍ തുര്‍ക്കി വഴിയാണ് അവശ്യ വസ്തുക്കള്‍ എത്തിച്ചിരുന്നത്. പിന്നീട് ഡമസ്‌കസ് വഴി നേരിട്ട് സഹായമെത്തിക്കാന്‍ തുടങ്ങി. ഡമസ്‌കസില്‍ സഹായവുമായി അഞ്ചാമത്തെ ഖത്തര്‍ വിമാനമാണ് ഇപ്പോള്‍ എത്തിയത്. കഴിഞ്ഞ ദിവസം റിയാദില്‍ നടന്ന യോഗത്തില്‍ സിറിയക്ക് എല്ലാവിധ സഹായവും ഖത്തര്‍ പ്രധാനമന്ത്രി വാഗ്ദാനം ചെയ്തിരുന്നു.