കൊച്ചി : എറണാകുളം – അങ്കമാലി അതിരൂപതാ സാമൂഹ്യ പ്രവർത്തനവിഭാഗമായ സഹൃദയ സ്ഥാപിതമായതിന്റെ വജ്ര ജൂബിലി വർഷാചരണത്തിന് കൃതജ്ഞതാബലിയോടെ തുടക്കമായി. അതിരൂപത ബിഷപ്പ് എമരിറ്റസ് മാർ തോമസ് ചക്യത്ത് ജൂബിലി തിരി തെളിച്ചു. അദ്ദേഹത്തിന്റെ അധ്യക്ഷതയിൽ കാർഡിനൽ പാറേക്കാട്ടിൽ ഹാളിൽ ചേർന്ന ജൂബിലി സമ്മേളനം ഹൈബി ഈഡൻ എം.പി. ഉദ്‌ഘാടനം ചെയ്തു.
ദാരിദ്ര്യവും രോഗവും മുതൽ പ്രകൃതി ദുരന്തങ്ങൾ വരെയുള്ള വരെയുള്ള സാമൂഹ്യപ്രശ്നങ്ങളിൽ ജനങ്ങളോടൊപ്പം നിൽക്കുകയും പ്രശ്നങ്ങളെ ഫലപ്രദമായി നേരിടാനുള്ള സംവിധാനങ്ങൾ സമൂഹത്തിൽ രൂപപ്പെടുത്തുകയും ചെയ്യുന്ന പ്രസ്ഥാനങ്ങൾ കാലത്തെ അതിജീവിക്കുമെന്ന് ഹൈബി ഈഡൻ അഭിപ്രായപ്പെട്ടു. സാമൂഹ്യ വികസനപ്രക്രിയകളിൽ അധികാരികൾക്ക് ദിശാബോധം പകരുന്നതിനും ഇത്തരം സംഘടനകൾക്ക് കഴിയുമെന്നും അദ്ദേഹം ചൂണ്ടിക്കാട്ടി. സ്നേഹത്തിൽ അധിഷ്ഠിതമായ സാമൂഹ്യ സേവനപ്രവർത്തനങ്ങളാണ് മനുഷ്യനെ മനുഷ്യനാക്കുന്നതെന്ന് അധ്യക്ഷ പ്രസംഗത്തിൽ മാർ തോമസ് ചക്യത്ത് പറഞ്ഞു. വജ്ര ജൂബിലി വർഷ കർമപദ്ധതി എറണാകുളം ജില്ലാ പഞ്ചായത്ത് പ്രസിഡന്റ് അഡ്വ. മനോജ് മൂത്തേടൻ പ്രകാശനം ചെയ്തു. വനിതകളുടെ ആരോഗ്യവും പരിസ്ഥിതി സംരക്ഷണവും ലക്ഷ്യമിട്ട് നടപ്പാക്കുന്ന സുസ്മിതം പദ്ധതിയുടെ ഉദ്‌ഘാടനം സിനിമാ, സീരിയൽ താരം നിഷ സാരംഗ് നിർവഹിച്ചു.
സഹൃദയ ഡയറക്ടർ ഫാ. ജോസ് കൊളുത്തുവെള്ളിൽ, മുൻ ഡയറക്ടർമാരായ ഫാ. പോൾ മൂഞ്ഞേലി, ഫാ. തോമസ് വൈക്കത്തുപറമ്പിൽ, ഫാ. പോൾ ചെറുപിള്ളി, റീജിയണൽ ഡയറക്ടർ ഫാ. ആന്റണി ഇരവിമംഗലം, അസിസ്റ്റന്റ് ഡയറക്ടർ ഫാ. സിബിൻ മനയംപിള്ളി, കെയർ ആൻഡ് സേഫ് എം. ഡി. ആർ. വൈദ്യനാഥൻ, ബോർഡ് അംഗങ്ങളായ ഡോ. കെ. വി. റീത്താമ്മ, സിജോ പൈനാടത്ത് എന്നിവർ സംസാരിച്ചു.
