കൊച്ചി: സംസ്ഥാന സ്‌കൂള്‍ കായികമേളയിലെ ഗെയിംസ് മത്സരങ്ങള്‍ക്ക് ഇന്ന് തുടക്കമാകും. ഫുട്ബോള്‍, ഹാന്‍ഡ് ബോള്‍, ടെന്നീസ്, വോളിബോള്‍ ഉള്‍പ്പെടെയുള്ള ഇനങ്ങളാണ് ഇന്ന് നടക്കുക. 18 ഇനങ്ങളിലാണ് ഇന്ന് മത്സരം നടക്കുന്നത്.
എട്ട് ദിവസമാണ് കായിക മേള. 17 വേദികളിലായാണ് മത്സരങ്ങള്‍ നടക്കുക. പ്രത്യേക പരിഗണന ആവശ്യമുള്ള വിദ്യാര്‍ഥികള്‍ക്കായുള്ള ഗെയിംസ് ഇനങ്ങളും ഇന്ന് ആരംഭിക്കും. അത്‌ലറ്റിക് മത്സരങ്ങള്‍ വ്യാഴാഴ്ചയാണ് നടക്കുക. മത്സരങ്ങള്‍ക്ക് അരമണിക്കൂര്‍ മുമ്ബ് തന്നെ റിപ്പോര്‍ട്ട് ചെയ്യണമെന്ന നിര്‍ദേശം വിദ്യാര്‍ഥികള്‍ക്ക് വിദ്യാഭ്യാസവകുപ്പ് നല്‍കിയിട്ടുണ്ട്.
പ്രധാന വേദിയായ മഹാരാജാസ് കോളജ് മൈതാനത്തിന് പുറമെ 16 വേദികളിലും മത്സരങ്ങള്‍ നടക്കും. നീന്തല്‍ മത്സരങ്ങള്‍ പൂര്‍ണമായും കോതമംഗലത്തും ഇന്‍ഡോര്‍ മത്സരങ്ങള്‍ കടവന്ത്ര റീജണല്‍ സ്പോര്‍സ് സെന്ററിലും ആയാണ് നടക്കുന്നത്. കളമശ്ശേരിയിലും ടൗണ്‍ഹാളിലും മത്സരങ്ങള്‍ നടക്കും. 11ാം തീയതി വരെ നടക്കുന്ന മത്സരങ്ങളില്‍ 39 ഇനങ്ങളിലായി 2,400ഓളം കുട്ടികള്‍ പങ്കെടുക്കും.
