തിരുവനന്തപുരം: ചെറിയ ഒരിടവേളക്ക് ശേഷം സംസ്ഥാനത്ത് വീണ്ടും മഴ കനക്കും. കേരള തീരം തൊട്ട് മഹാരാഷ്ട്ര തീരംവരെ ന്യൂനമർദ്ദപാത്തി രൂപപ്പെട്ടതിനാല് സംസ്ഥാനത്തിന്റെ വടക്കൻ ജില്ലകളില് മഴ സജീവമാകുമെന്ന് കേന്ദ്ര കാലാവസ്ഥ വകുപ്പ് മുന്നറിയിപ്പ് നല്കി. കോഴിക്കോട്, കണ്ണൂർ, കാസർകോട് ജില്ലകളില് യെല്ലോ അലർട്ട് പ്രഖ്യാപിച്ചിട്ടുണ്ട്.
കൂടാതെ, മധ്യ കിഴക്കൻ അറബിക്കടലില് മഹാരാഷ്ട്ര തീരത്തിന് സമീപത്തെ ന്യൂനമർദ്ദവും പശ്ചിമ ബംഗാളിനും വടക്ക് കിഴക്ക് ജാർഖണ്ഡിനും മുകളിലായി മറ്റൊരു ന്യൂനമർദ്ദം രൂപപ്പെട്ടതും കേരളത്തില് വരും ദിവസങ്ങളില് മഴ സാധ്യത വർധിപ്പിക്കുന്നുണ്ട്.
വടക്കൻ ബംഗാള് ഉള്ക്കടലില് രൂപപ്പെട്ട ചക്രവാതച്ചുഴിയും കേരളത്തിന് മഴ അനുകൂല സാഹചര്യമാണുണ്ടാക്കുക. അതി തീവ്രമഴ പ്രതീക്ഷിക്കുന്നില്ലെങ്കിലും ഒറ്റപ്പെട്ട സ്ഥലങ്ങളില് ഇന്നും ഓഗസ്റ്റ് 27 നും ശക്തമായ മഴക്ക് സാധ്യതയുണ്ടെന്നാണ് കാലാവസ്ഥ കേന്ദ്രത്തിന്റെ അറിയിപ്പ്. യെല്ലോ അലർട്ട് പ്രഖ്യാപിച്ച ജില്ലകളില് 24 മണിക്കൂറില് 64.5 മില്ലിമീറ്റർ മുതല് 115.5 മില്ലിമീറ്റർ വരെ മഴ ലഭിച്ചേക്കാം.