ന്യൂഡൽഹി: വൻ കോലാഹലങ്ങൾക്കും മുദ്രാവാക്യങ്ങൾക്കുമിടയിൽ മുഖ്യമന്ത്രിമാരേയും, മന്തിമാരേയും, പുറത്താക്കാൻ കഴിയുന്ന മൂന്ന് വിവാദ ബില്ലുകൾ ആഭ്യന്തര മന്ത്രി അമിത് ഷാ ലോക്സഭയിൽ അവതരിപ്പിച്ചു.
ഭരണഘടന (130-ാം ഭേദഗതി) ബിൽ, കേന്ദ്രഭരണ പ്രദേശങ്ങളുടെ സർക്കാർ (ഭേദഗതി) ബിൽ, ജമ്മു കശ്മീർ പുനഃസംഘടന (ഭേദഗതി) ബിൽ എന്നീ മൂന്ന് ബില്ലുകൾ അവതരിപ്പിച്ചപ്പോൾ, പ്രതിപക്ഷം എഴുന്നേറ്റു നിന്ന് നിയമനിർമ്മാണത്തിന്റെ പകർപ്പുകൾ വലിച്ചുകീറി.
പ്രതിപക്ഷം നിയമനിർമ്മാണത്തെ “ക്രൂരമായത്” എന്ന് വിശേഷിപ്പിച്ചു, മന്ത്രിമാരെയും മുഖ്യമന്ത്രിമാരെയും ഏകപക്ഷീയമായി അറസ്റ്റ് ചെയ്ത് പ്രതിപക്ഷം ഭരിക്കുന്ന സംസ്ഥാനങ്ങളെ അസ്ഥിരപ്പെടുത്താൻ സർക്കാർ ഇത് ഉപയോഗിക്കുമെന്ന് ആശങ്ക പ്രകടിപ്പിച്ചു.
ബില്ലുകൾ ഒരു സംയുക്ത സമിതിയുടെ പരിശോധനയ്ക്ക് അയയ്ക്കണമെന്ന് ഷാ നിർദ്ദേശിക്കുമ്പോൾ, തൃണമൂൽ എംപി കല്യാൺ ബാനർജിയും മറ്റ് പ്രതിപക്ഷ നേതാക്കളും ബില്ലുകളുടെ പകർപ്പുകൾ വലിച്ചുകീറി ആഭ്യന്തരമന്ത്രിക്ക് നേരെ എറിഞ്ഞു. മന്ത്രിയുടെ അടുത്ത് കടലാസ് കഷണങ്ങൾ വീഴുന്നത് ദൃശ്യങ്ങളിൽ കാണിച്ചു. എന്നിരുന്നാലും, ബില്ലുകളുടെ പകർപ്പുകൾ കീറുന്നത് ബാനർജി നിഷേധിച്ചു.
