ഇരിങ്ങാലക്കുട: കേരള പൊതുജനാരോഗ്യനിയമം 2023 പ്രകാരം എടുത്ത കേസിൽ സംസ്ഥാനത്ത് ആദ്യത്തെ കോടതിവിധി. വീട്ടുപരിസരത്ത് കൊതുകിന്റെ കൂത്താടികളെ കണ്ടെത്തിയാൽ 2000 രൂപ പിഴ അടക്കേണ്ടി വരും എന്ന് കോടതി വിധി. ബ്ലോക്ക് കുടുംബാരോഗ്യ കേന്ദ്രം ഹെൽത്ത് സൂപ്പർവൈസർ ഫയൽ ചെയ്ത കേസിൽ മുരിയാട് പുല്ലൂർ സ്വദേശിക്ക് ഇരിങ്ങാലക്കുട ഫസ്റ്റ് ക്ലാസ് ജുഡീഷ്യൽ മജിസ്ട്രേട്ട് കോടതി 2000 രൂപ പിഴ വിധിച്ചു. സംസ്ഥാനത്ത് ആദ്യമായാണ് ഈ നിയമപ്രകാരമുള്ള ശിക്ഷയെന്ന് ആരോഗ്യ വകുപ്പ് അറിയിച്ചു.
പ്രദേശത്ത് ഡെങ്കിപ്പനി വ്യാപകമായപ്പോൾ, കൊതുകു വളരുന്ന സാഹചര്യം ഒഴിവാക്കാൻ ആരോഗ്യ വകുപ്പ് നിർദേശം നൽകിയിരുന്നു. ഇത് അനുസരിച്ചില്ലെന്നു കണ്ടതിനെ തുടർന്നാണ് ഹെൽത്ത് സൂപ്പർവൈസർ കെ.പി.ജോബി കേസെടുത്തത്.
