ബംഗളൂരു: കർണാടകയിലെ അങ്കോലയില് ചൊവ്വാഴ്ചയുണ്ടായ മണ്ണിടിച്ചിലില് അകപ്പെട്ടെന്ന് കരുതുന്ന കോഴിക്കോട് സ്വദേശിയായ ലോറി ഡ്രൈവറെയും ലോറിയെയും ഇനിയും കണ്ടെത്താനായില്ല. ലോറി ഡ്രൈവര് അര്ജുന് സഞ്ചരിച്ചിരുന്ന ലോറി മണ്ണിനടിയിലാണെന്നാണ് സൂചന. ലോറിയില് നിന്നുള്ള ജി.പി.എസ്. സിഗ്നല് അവസാനമായി ലഭിച്ചത് മണ്ണിടിച്ചില് നടന്ന സ്ഥലത്തുനിന്നാണെന്നതാണ് സംശയത്തിന് കാരണം. അര്ജുനെ കാണാനില്ലെന്ന് ബന്ധുക്കള് രക്ഷാപ്രവര്ത്തകരെ അറിയിച്ചിട്ടുണ്ട്.
മണ്ണിടിച്ചിലില് 12 പേർ മരിച്ചതായാണ് വിവരം. മുംബൈയിലേക്ക് ചരക്കുമായി പോകുകയായിരുന്നു ഡ്രൈവറായ അർജുൻ. ഇതിനിടെയാണ് അങ്കോലയിലുണ്ടായ വൻ മണ്ണിടിച്ചിലില് പെട്ടത്. ബന്ധുക്കള് രക്ഷാപ്രവർത്തകരുമായി ബന്ധപ്പെട്ടെങ്കിലും വിവരമൊന്നും ലഭിച്ചിരുന്നില്ല. അപകടശേഷം വിളിച്ചപ്പോള് അർജുന്റെ ഫോണ് ഒരു തവണ റിങ് ചെയ്തിരുന്നതായി കുടുംബം പറയുന്നു. പിന്നീട് ഫോണ് സ്വിച്ച് ഓഫ് ആയി. ലോറി ഡ്രൈവർമാർ സ്ഥിരമായി വിശ്രമിക്കാൻ നിർത്താറുണ്ടായിരുന്ന സ്ഥലത്താണ് വൻ മണ്ണിടിച്ചിലുണ്ടായത്.
