ആദായ നികുതി ബിൽ ലോക്സഭയിൽ അവതരിപ്പിച്ച് ധനമന്ത്രി

ഡൽഹി: ലോക്സഭയിൽ ആദായനികുതി ബിൽ 2025 അവതരിപ്പിച്ച് ധനമന്ത്രി നിർമ്മല സീതാരാമൻ. ഇന്ത്യയിലെ നികുതി നിയമങ്ങളിൽ ഉപയോഗിക്കുന്ന പദാവലി ലളിതമാക്കുക, അതുവഴി നികുതിദായകർക്ക് നികുതി അടയ്ക്കുന്നതും റിട്ടേണുകൾ സമർപ്പിക്കുന്നതും എളുപ്പമാക്കുക എന്നതാണ് പുതിയ ബിൽ ലക്ഷ്യമിടുന്നത്. ബിൽ സഭയുടെ സെലക്ട് കമ്മിറ്റിക്ക് വിടണമെന്ന് ധനമന്ത്രി സ്പീക്കർ ഓം ബിർളയോട് ആവശ്യപ്പെട്ടു. നിർദ്ദിഷ്ട പാനലിന്റെ ഘടനയും നിയമങ്ങളും സംബന്ധിച്ച് സ്പീക്കർ തീരുമാനമെടുക്കണമെന്നും അവർ ആവശ്യപ്പെട്ടു. മാർച്ച് 10 വരെ ലോക്സഭ പിരിഞ്ഞു. 2025 ഏപ്രിൽ മുതൽ ബിൽ പ്രാബല്യത്തിൽ വരുമെന്നാണ് വിവരം.