രക്തശാലി വിളയും മല്ലികശ്ശേരി പാടത്ത്

എലിക്കുളം: കാഞ്ഞിരപ്പള്ളി താലൂക്കിലെ നെൽ കൃഷിയുള്ള ഏക പഞ്ചായത്തായ എലിക്കുളം പുതിയ പാടശേഖരത്തിലേക്ക് കടന്നിരിക്കുകയാണ്. കാൽനൂറ്റാണ്ട് തരിശ്ശായി കിടന്ന മല്ലികശ്ശേരിയിലെ നാലേക്കർ , കോക്കാട്ട് – ഇടയ്ക്കാട്ട് പാടശേഖരത്ത് ഇനി രക്തശാലി നെൽ വിത്തുകൾ വിളയും. എലിക്കുളം പഞ്ചായത്തിൽ ആദ്യമായാണ് ഏറെ ഔഷധ ഗുണമുള്ള ഇത്തരം നെൽ വിത്ത് വിതയ്ക്കുന്നത്. പണ്ടുകാലത്ത് നമ്മുടെ പൂർവ്വികർ വിതച്ചിരുന്ന അപൂർവ്വ ഇനത്തിൽപ്പെട്ടതും ഏറെ രോഗപ്രതിരോധ ശേഷിയുള്ളതുമാണിത്. വിത്തുവിതയ്ക്കലിന്റെ ഉദ്ഘാടനം മാണി.സി. കാപ്പൻ എം.എൽ.എ. നിർവ്വഹിച്ചു. എലിക്കുളം ഗ്രാമ പഞ്ചായത്ത് പ്രസിഡന്റ് ജിമ്മിച്ചൻ ഈറ്റത്തോട്ട് അധ്യക്ഷനായിരുന്നു. ബ്ലോക്ക് പഞ്ചായത്തംഗം ബെറ്റി റോയ് മുഖ്യ പ്രഭാഷണം നടത്തി. എലിക്കുളം കൃഷി ഓഫീസർ കെ.പ്രവീൺ പദ്ധതി വിശദീകരിച്ചു. ഗ്രാമ പഞ്ചായത്തംഗങ്ങളായ മാത്യൂസ് പെരുമനങ്ങാട്, ആശ റോയ് സെൽവി വിൽസൺ, ദീപ ശ്രീജേഷ്, അഖിൽ അപ്പുക്കുട്ടൻ, ജയിംസ് ജീരകത്ത്, യമുന പ്രസാദ്, പാടശേഖര ഉടമകളായ മാത്യു കോക്കാട്ട്, ജോജോ ഇടയ്ക്കാട്ട്, എലിക്കുളം നാട്ടു ചന്ത പ്രസിഡന്റ് സെബാസ്റ്റ്യൻ വെച്ചൂർ, കാപ്പു കയം പാടശേഖര സമിതി സെക്രട്ടറി ജസ്റ്റിൻ മണ്ഡപത്തിൽ എന്നിവർ സംസാരിച്ചു.