30 വർഷത്തിനിടയിലെ ഏറ്റവും വലിയ കാട്ടുതീയാണ് ഇപ്പോൾ ജപ്പാൻ നേരിടുന്നത്. വടക്കൻ ഇവാട്ടെ മേഖലയിൽ ഇതിനകം ഒരാളുടെ ജീവൻ അപഹരിച്ച തീപിടുത്തത്തെ നേരിടാൻ 2,000-ത്തിലധികം അഗ്നിശമന സേനാംഗങ്ങളും സൈനിക ഹെലികോപ്റ്ററുകളും കിടഞ്ഞു പരിശ്രമിക്കുകയാണ്. രാജ്യത്തെ റെക്കോർഡ് ഭേദിച്ച ചൂടുള്ള വേനൽക്കാലവും, കുറഞ്ഞ മഴയെയും തുടർന്നാണ് ഒഫുനാറ്റോ നഗരത്തിന് സമീപം തീ പടർന്നുപിടിച്ചത്.
ഫെബ്രുവരി 27 ന് ഉണ്ടായ തീപിടുത്തത്തിൽ ഏകദേശം 5,200 ഏക്കർ (2,100 ഹെക്ടർ) ഭൂമി കത്തിനശിച്ചു. തലസ്ഥാന നഗരമായ ടോക്കിയോ ഉൾപ്പെടെ 14 പ്രദേശങ്ങളിൽ നിന്നുള്ള അടിയന്തര സേവന ഉദ്യോഗസ്ഥരുടെ ശ്രമങ്ങൾ ഉണ്ടായിരുന്നിട്ടും, 1992-ൽ കുഷിറോയിലുണ്ടായ കാട്ടുതീയെക്കാൾ വ്യാപ്തിയോടെയാണ് ഇപ്പോൾ ജപ്പാനിൽ തീ പടർന്നു പിടിക്കുന്നത്. 1992-ലെ കാട്ടുതീക്ക് ശേഷമുള്ള ഏറ്റവും വലിയ തീപിടുത്തമാണിത് എന്നാണ് എഫ്ഡിഎംഎ വക്താവ് പറഞ്ഞത്. ഈ പാരിസ്ഥിതിക ദുരന്തത്തിനിടയിലും, ജനവാസ കേന്ദ്രങ്ങൾ സംരക്ഷിക്കുന്നതിനുള്ള സമഗ്രമായ നടപടികൾ സ്വീകരിക്കുമെന്ന് പ്രധാനമന്ത്രി ഷിഗെരു ഇഷിബ പൊതുജനങ്ങൾക്ക് ഉറപ്പ് നൽകി. “ഒരു പരിധിവരെ തീയുടെ വ്യാപനം തടയുന്നതും, ആളുകളുടെ വീടുകളിൽ ഒരു ആഘാതവും ഉണ്ടാകില്ലെന്നതും ഉറപ്പാക്കാൻ സാധ്യമായ എല്ലാ നടപടികളും ഞങ്ങൾ സ്വീകരിക്കും,” എന്ന് ഇഷിബ പ്രഖ്യാപിച്ചു.
മൂന്ന് പതിറ്റാണ്ടിനിടയിലെ ഏറ്റവും വലിയ കാട്ടുതീക്കെതിരെ ജപ്പാൻ പോരാടുമ്പോൾ, അഗ്നിശമന സേനാംഗങ്ങളുടെയും സൈന്യത്തിന്റെയും സർക്കാരിന്റെയും ശ്രമങ്ങൾ കാലാവസ്ഥാ വ്യതിയാനം ഉയർത്തുന്ന നിർണായക വെല്ലുവിളിയെ അടിവരയിടുന്നു. ആയിരക്കണക്കിന് ഹെക്ടർ വനം ഇതിനകം തന്നെ നശിപ്പിക്കപ്പെടുകയും അപകടത്തിലാകുകയും ചെയ്ത സാഹചര്യത്തിൽ, കാലാവസ്ഥാ സംബന്ധമായ ദുരന്തങ്ങളിൽ ആഗോള ശ്രദ്ധ ചെലുത്തേണ്ടതിന്റെ ആവശ്യകതയെ ഈ സംഭവം ഊന്നിപ്പറയുന്നു.
